Општина Демир Хисар по завршувањето на реконструкцијата на градската водоводна мрежа на која се поврзани потрошувачите од градот и населените места Суводол, Кутретино и Слепче, почна со инсталација на нови пумпи за локалниот водовод.
Од секторот за односи со јавност на општина Демир Хисар информираат дека првпат по две и пол децении вршат заменување на пумпните поостројки во двата црпни бунари кај селото Граиште и во прецрпниот базен кај селото Мургашево.
– Станува збор за капитална инвестиција во вредност од 8.6 милиони денари или околу 140 илјади евра, средства обезбедени преку проект за водоснабдување и одведување на отпадни води на Министерството за транспорт и врски, од Европска инвестициска банка и македонската Влада. Со дел од сопствени средства за изработка на техничката документација учествуваше и општина Демир Хисар, односно ЈКП „Комуналец“. Паралелно со инсталирањето на оваа опрема, се поставува и електромагнетен мерач на проток, како и потполно нова командна табла и нов софтвер за автоматско работење на системот, соопштуваат од општина Демир Хисар.
Општина Демир Хисар по инсталирањето на новата опрема, со сопствени средства и стручен тим, ќе ги репарира постојните постројки, а со завршувањето на овој проект честите прекини во водоснабдувањето како резултат на дефектите на старите пумпи ќе бидат запрени.