На спомен-бистата на борците од Народноослободителната борба пред зградата на општина Крива Паланка денеска беше положено цвеќе во чест на двата Илиндена.
Цвеќе положи делегација од општина Крива Паланка предводена од градоначалникот Арсенчо Алексовски, претставници од општинскиот Сојуз на борци од Крива Паланка, пратеникот во Собранието на Република Македонија од ВМРО-ДПМНЕ Слаѓана Митовска, делегација од партијата, граѓани…
– Овој ден е празник над празниците, ден кога ги славиме двата Илиндена со кои се означени темелите на македонската држава. Им го честитам празникот на сограѓаните и сите Македонци каде и да се, изјави градоначалникот на Крива Паланка Арсенчо Алексовски.
Честитки по повод големиот национален празник упати и пратеничката Митовска.
– Посакувам да си ја почитуваме историјата и да си ја сакаме сегашноста, со визија за иднината, зашто народ без минато нема иднина, порача Митовска.
Со едноминутно молчење присутните им оддадоа почит на паднатите борци.