Граѓаните што протестираа во Кочани од пред Јавното обвинителство и Основниот суд во Кочани, се упатија кон домот на градоначалникот во оставка Љупчо Папазов.
Попатно беше демолирано возило на Карго експрес, компанија за која сопственикот на дискотеката „Пулс“ е претставник за Кочани.
Лицата што протестираа го пробија кордонот полицајци пред домот на Папазов, бараа одговорност, а неговата куќа беше гаѓана со јајца и камења.
На денешниот протест во Кочани граѓаните, меѓу кои и многу млади лица, побараа правда за своите блиски кои ги изгубија во пожарот и виновниците да ги добијат казните што ги заслужуваат.
Протестот почна од паркот, но продолжи пред општинската зграда со извици „Бараме правда“, „Секој еден, може да е следен“, „Убијци“…. Потоа се упатија пред општинската зграда каде фрлаа со јајца и бараа да излезе градоначалникот.