Јавното претпријатие за комунални дејности „Комуналец“ од денеска во погон го пушти возилото наречено автометачка со која ќе се чистат улиците во поширокото градско подрачје. Станува збор за машинско собирање на сметот од улиците во градот што ќе овозможи повисоко ниво на чистота од сегашното.
Автометачката преку вградените распрскувачи прво ја распрскува водата па мете и го собира сметот со што го попречува ширењето на прашината при метењето на што најчесто се жалеа граѓаните при рачното метење на улиците.
Автометачката има контејнер со капацитет од два метри кубни отпад и во овој период ќе го собира сметот во раните утрински часови за да не го попречува сообраќајот и движењето на граѓаните, а понатаму ќе се движи по однапред утврдена маршута за која ќе бидат информирани и граѓаните. Од ЈПКД „Комуналец“ најавуваат дека во погон ќе биде пуштена уште една автометачка, а додаваат дека и со вградување на гумирани четки ќе може да се собира и сметот од гранитните плочки на плоштадот „Гоце Делчев“.
Со ова машинско чистење на улиците, „Комуналец“ уште еднаш ја потврдува заложбата за поголема чистота во Струмица.
