Европскиот парламент ќе го одложи гласањето на пленарна седница за Резолуцијата за Република Македонија, доколку земјата следната недела не добие Влада, јавува дописникот на МИА од Брисел.
Високи официјални лица на Европарламентот, во изјава за МИА потврдија дека европратениците не сакаат да ја усвојат Резолуцијата што претходно ја изгласа Комитетот за надворешни работи (АФЕТ) на ЕП на пленарна седница во Стразбур, закажана за 14 и 15 овој месец, доколку дотогаш нема некаква разврска на македонската политичка сцена.
– Иако на пленарната седница во Европскиот парламент во Стразбур на 14 и 15 март требаше да ги изгласаме резолуциите за сите држави од Западниот Балкан, сепак, официјално е веќе одложено гласањето за Резолуцијата за Србија, поради нашата желба да не влијаеме на претседателските избори во оваа земја што ќе се одржат на 2 април. Ист е случајот и со Македонија. Ако до 13-ти овој месец нема разврска, односно не биде избрана нова Влада, тогаш и Резолуцијата за Македонија ќе биде одложена и заедно со српската ќе бидат гласани на пленарната седница на ЕП следниот месец, информираше висок претставник на Европарламентот, инсистирајќи на анонимност.
Со 54 гласа за и само осум против, Комитетот за надворешни работи на Европскиот парламент минатата недела ја усвои предлог-Резолуцијата за напредокот на Република Македонија во европските интеграции во 2016 година, каде по осми пат препорача отворање на пристапните преговори за влез во Европската унија. Но, за Резолуцијата да биде полноважечка, потребно е и целиот состав од 751 европратнеик да гласа за неа, што се прави на пленарна седница што се одржува еднаш во месецот.