Општина Демир Хисар во соработка со локалното комунално претпријатие „Комуналец“ ги интензивира еколошките акции, врши уредување на руралните средини и посебно излетничките места на подрачјето на локалната самоуправа.
Од секторот за односи со јавност информираат дека зголемените активности се планирани и се реализираат во пресрет на големиот празник Илинден, кога во општината доаѓаат гости во посета на црквите и манастирите на општината, славното Смилево, но и други локации во Демир Хисар како избран Град на културата во 2018 година.
– Интервенираме и на барање на локалното население. По барање на месната заедница од Ново Село, спроведовме активности за расчистување од ниска и висока вегетација на просторот околу црквата Св. Архангел, во селото Ново Село. Екипа на ЈКП „Комуналец“ целосно го исчисти просторот и депонијата, а ќе продолжи со чистење и на други локации низ населените места во општината, истакна Даниел Станојоски, портпарол на општина Демир Хисар.