Две двојки, Стефан Куковски и Маргарита Ивановска и Иван Сареивски и Ана Гареска, во црквата Св. Петар и Павле, во Галичник денеска се венчаа со што заврши 41. издание на манифестацијата Галичка Свадба.
Од вознобувањето на оваа културно-туристичка манифестација, ова е прв пат да се организира двојна веселба.
Домашните обичаи се изведуваа на две места, со две тајфи сватови и музика.
Свадбените обичаи започнаа синоќа со китењето на бајракот и носењето на невестите на вода, а продолжија утрово со канење на мртвите, кумот и најблиските.
Со галичката свадба, уникатна манифестација, на посетителите им се преставуваат околу 30-тина свадбени обичаи карактеристични за мијачкиот крај од кои повеќето и денес се изведуваат на македонските свадби.
И годинава, пред чешмата Упија и низ селските сокаци можеа да се видат раскошните носии, а со звуците на дебарските мајстори на тапанот и зурлата, беа изиграни ората: тешкото, невестинско, свекрвино…
Месната заедница Галичник, организаторот на Галичката свадба, со оваа двојна свадба, како што беше речено, се испраќа порака до младите парови: да има што повеќе венчавки и повеќедетни семејства во Македонија, онака како што пред многу години во Галичник, на Петровден се правеле и по педесетина свадби, така и сега да се врати традицијата и да има повеќе венчавки.
Годинава тројца од четворицата младенци, кои се венчаа, имаат потекло од Галичник. Ана Гареска и Иван Сариевски се по потекло галичани и претходно биле учесници во сватовските свити.
– Огромна цест и задоволство е да се прави Галичка свадба, зошто тоа е начинот на кој нашите предци ја крунисувале својата љубов. Чувството е неповторливо. Тоа е еден вид на сплотување на минатото и на сегашноста, вели Гареска.
Ана и Иван, кој е внук на славниот македонски пејач Александар Сариевски, се две години во врска, иако се познаваат повеќе од една деценија. Маргарита Ивановска, втората невеста е битолчанка по потекло, со голема љубов зборува за Галичник.
– Јас и Стефан се запознавме во Скопје, но нашата љубов се разви во Галичник. Затоа сакам ова место да го направиме храм на љубовта. Веќе се чувстувам како Галичанка, вели Ивановска. Таа и Стефан, галичанец по потекло, се две години во врска.