Дванаесет студенти од Македонија добија можност еден месец летово да ја истражуваат Европа и да ја промовираат својата земја преку проектот „Патуваме во Европа“ во организација на Граѓанската асоцијација МОСТ.
Студентите се избрани на јавен конкурс и според просечната оценка во текот на студирањето, редовност во студирањето и познавањето странски јазици. Патувањето ќе го почнат во Берлин, каде три дена ќе имаат можност да се дружат со своите врсници во регионот.
Граѓанската асоцијација МОСТ, со помош на донатори и спонзори, на студентите им обезбедува Интер раил карта за неограничено патување со воз за 22 дена, патничко осигурување, студентска картичка од Аурора турс и дел од средствата кои ќе им бидат потребни на платежна картичка се обезбедени од Тутунска банка. На студентите, исто така, им се доделени и бесплатни брошури за промоција на Македонија донирани од Агенцијата за промоција и поддршка на туризмот.
– Целта на „Патуваме во Европа“ е студенти од Македонија преку патување и посети директно да се запознаат со демократските вредности, навики и култури во другите земји, и да ги промовираат и доближат тие вредности во Македонија. Во исто време студентите ќе ја промовираат и Македонија. Ова е десетта генерација студенти кои ја имаат оваа уникатна можност за патување низ Европа. Изминатите години повеќе од 120 македонски студенти беа дел од проектот, соопшти МОСТ.
„Патуваме во Европа“ е регионален проект во кој се опфатени студенти од Македонија, Србија, Косово, Црна Гора, Босна и Херцеговина и Албанија. Донатор на проектот е Фондацијата „Роберт Бош“ од Германија, преку Балканскиот фонд за демократија од Белград.