Наставните програми на Меѓународниот центар за наставни програми Кембриџ, кои се воведени од прво до трето одделение, ќе продолжат да се имплементираат од четврто до шесто одделение.
Договор за продолжување на соработката денеска ќе потпишат министерот за образование и наука Абдилаќим Адеми, заменик-министерот Спиро Ристовски, заменик директорот на Бирото за развој на образованието Ајше Селмани и генералниот директор на Меѓународниот центар за наставни програми – Кембриџ Мајкл О’Саливан.
Заменик-министерот Ристовски, кој вчера со О’Саливан посети основно училиште во Кисела Вода, истакна дека по една и пол година од почнувањето на преговорите за реализација на Кембриџ програмата во македонскиот образовен систем, учениците од прво до трето одделение веќе изучуваат математика и природни науки по комплетно нови реформирани наставни програми.
– Ќе продолжиме со реформирање на наставните програми по математика и природни науки од четврто до шесто одделение. Очекувам во текот на наредната година по успешното завршување на овој втор дел од реформата да го комплетираме, односно завршиме реформирањето на делот на основно образование, од седмо до деветто, истакна Ристовски вчера при посетата на ОУ „Круме Кепески“.