„Фондацијата за развој на образованието и културата – АЛБИЗ континуирано промовира висок степен на општествена свест и одговорност на компаниите членки на Стопанската комора на северо-западна Македонија, кои се всушност нејзини основачи и кои посветено се заложуваат за развојот на повеќе сфери како формалното образование, неформалната едукацијата, спортот и културата“ истакна заменик министерот за образование и наука Арбер Адеми на доделувањето на стипендии за студенти кои Фондацијата АЛБИЗ ги обезбеди за академската 2017/2018 година.
Тој додаде дека одговорноста и очекувањата за подигнување на стандардите за квалитет на образовниот систем се најмногу сконцентрирани во Министерството за образование и наука, но во целиот тој процес од особено значење се заложбите и активностите на сите општествени чинители, кои имаат интерес, желба и можности да помогнат на било каков начин кон јакнењето на воспитно – образовниот процес во земјата.
Тој се заблагодари на Фондацијата, што и оваа година одвои финансиски средства за поддршка на младите кои одлучиле да стекнат академско знаење, посочувајќи ја за позитивен општествен пример и посакувајќи традицијата на стипендирање ученици и студенти да продолжи и во периодот што следи.
“Драго ми е што заеднички го надополнуваме и прошируваме системот на стипендирање кој го има изградено Министерството за образование и наука и кој нуди десетици видови стипендии и финансиска поддршка за различни категории на ученици и студенти од Република Македонија кои одлучуваат да се едуцираат во земјата и во странство. Од стипендии за ученици и студенти кои потекнуваат од семејства со незавиден социјален и материјален статус, до стипендии за ученици и студенти кои имаат исклучителен талент и се запишале на некоја врвна светска образовна установа, на некој од најдобрите 100 светски универзитети“, рече Адеми.
Тој додаде дека Владата веќе одлучила да се воведат и нови видови финансиски стимулации за едукација на младите, посочувајќи ги стипендиите за студентите кои ќе одлучат да се запишан на студиските програми за одделенски наставници.