Општина Велес во моментов не должи никому и финансиски е стабилна. Ребаланс на буџет и измена на програми се редовна пракса, а тоа значи дека во моментов се усогласуваат програмите со финансиските можности.
Ова денеска го изјави градоначалникот на општина Велес Славчо Чадиев, како одговор на обвинувањата за кратење на некои од програмите на последната седница на Советот, искажани од советничката група предводена од СДСМ на прес-конференција.
– Стабилноста на општина Велес не е доведена во прашање. Секогаш првиот и вториот квартал во годината се послаби во однос на прибирањето на средства во буџетот за разлика од третиот и четвртиот квартал. Тоа значи дека ќе се прилагодуваме спрема она што го имаме и ќе се држиме до законските определби и можности што ги дава Министерството за финансии да има еден или два ребаланси на буџетот, потенцира Чадиев.
Тој за деновиве најави и отчет пред граѓаните за 100-те дена од превземањето на локалната власт.