Во градската библиотека „Гоце Делчев“ во Велес денеска беа предадени книги собрани од акцијата на библиотеката и граѓаните на Велес: „Подари книга, подари светлина“. Најголем дел од собраните 1200 книги ги доби Територијалната противпожарна единица од Велес, која формираше своја библиотека.
Директорот на библиотеката Игор Крајчев изјави дека ова е најдобрата акција што ја организирале. Им се заблагодари на сите граѓани кои донираа свои книги и ги повика да продолжат со навиката за дарување.
– Собравме околу 1200 книги кои ги поделивме на книги за возрасни и на книги за деца. Согласно со планот за акцијата, одлучивме книгите за возрасни да и ги донираме во Противпожарната единица во Велес, а книгите за деца ќе ги донираме во Центарот за социјална работа во Велес, информираше Крајчев.