Лидерот на ДУИ, Али Ахмети, по лидерската средба, рече дека постојат разлики меѓу партиите и дека очекува храброст од сите партиски чинители. Тој рече дека политичките лидери денеска не постигнале решение и дека очекува тоа да се случи во следните денови.
„Сите партии се заинтересирани за решение. Има разлики меѓу партиите, но сите треба да се ангажираме за успешна разрешница. Останува да се разговара во наредните денови и очекувам храброст од сите за да не ја испуштиме историската шанса“, рече Ахмети.
На средбата учествуваа премиерот и лидер на СДСМ, Зоран Заев, лидерот на ДУИ, Али Ахмети, претседателот на опозициската ВМРО-ДПМНЕ, Христијан Мицкоски, и Билал Касами од Беса.
Средбата во овој формат се одржува по барање на Мицкоски, кој синоќа побара новата средба да биде со четворицата лидери на најголемите партии, а не во проширен состав.
На состанокот лидерите разговараа за референдумот за договорот со Грција, кој треба да се одржи оваа есен.
Галена Николовска – Ризвановиќ