Министерството за земјоделство, наместо да изврши интервентен откуп на пченицата, продолжува со погрешни и контрапродуктивни мерки за решавање на состојбата со откупот на лебното жито, реагираат од СДСМ на денешната прес-конференција на министерот Љупчо Димовски.
„Во битолско-прилепскиот регион, пченицата или не е ожнеана или земјоделците ја носат дома, поради немањето интерес од страна на откупувачите да ја платат по 15 денари за килограм. Цели дворови им се полни со вреќи пченица која никој не ја откупува, а поради беспарицата, некои земјоделци се принудени да ја продават по 8-9 денари на трговци кои ја плаќаат на црно, во кеш. Единственото решение на проблемот, за кое се сложуваат и земјоделците и мелничарите, е владата да изврши интервентен откуп на пченица од индивидуалните земјоделци на кои реално производната цена им е повисока и на тој начин да го регулира пазарот. Само 10.000 тони да откупи по цена од 15 денари за килограм, тоа се нешто повеќе од 2 милиони евра. Овие пари државата повторно ќе си ги врати во јануари кога ќе ја пушти пченицата на продажба“, се наведува во реакцијата на СДСМ.