„Четири месеци над 20 илјади домаќинства кои живеат од производство на тутун чекаат исплата на заслужените субвенции. Навремено уште во месец февруари пред пратениците беше доставен предлогот за измена и дополнување на Законот за земјоделство и рурален развој. Техничка измена која ни овозможува веднаш, уште наредниот ден, откако законот ќе биде донесен да ја започнеме постапката за изготување на решенија за исплата на субвенции и оваа група на земјоделци конечно да ги добијат заслужените средства“, рече министерот за земјоделство, Љупчо Николовски.
„Одговорно тврдам дека парите за исплата на субвенциите за тутунарите уште пред три месеци се обезбедени во буџетот. Пари имаме и доколку денес се донесе законот, веднаш Платежната Агенција ќе започне со подготовка на решенијата за исплата, за да не изгубиме ниту ден повеќе.
Најпрво со месеци не се закажуваше седница на Комисијата за земјоделство при Собранието, но веќе откако тоа се случи, очекував единството и едногласното усвојување на овој закон на Комисијата, да се преслика како единство и на пленарната 64-та седница на Собранието и законот веднаш, без одлагање едногласно да биде усвоен.
Не разбирам зошто овој закон се блокира? Зошто наместо негово брзо донесување мора повторно со долги политички дискусии да се одоговлекува и блокира? Оваа блокада на законот не му наштетува на Љупчо Николовски. Оваа блокада директно им наштетува на повеќе од 20.000 семејства кои во екот на новата реколта ги чекаат субвенциите.
Ваквата блокада во овие кризни времиња, не само за тутунарите, дополнително ја намалува поддршката за македонските земјоделски производи, што може да влијае кон намалување на земјоделските површини и култури, а крајната штета да ја платат сите граѓани преку зголемување на цените на основните прехранбени производи.
Тргнете ја политиката од земјоделството, посебно сега во услови на криза. Место за политики и надмудрувања имало и ќе има, но никогаш тоа не смее да биде по штета на граѓаните.
Апелирам на разум кај сите пратеници, веднаш, без секунда одложување едногласно донесете го овој закон. Наместо на говорницата да го кажете партискиот глас слушнете го гласот на земјоделците и едногласно донесете ги законите преку кои им помагаме на земјоделските семејства, на младите земјоделци и на жените земјоделки“, изјави Љупчо Николовски.