Глобалните пазари се соочуваат со силен притисок бидејќи геополитичкиот конфликт на Блискиот Исток го нарушува снабдувањето со енергија и го менува однесувањето на инвеститорите. Крипто берзата Binance излезе со нов неделен пазарен преглед за влијание на моменталните случувања на глобалните пазари врз крипто пазарот.
Американските напади врз иранскиот остров Харг и блокадата на Ормускиот проток влијаеја врз приближно 20% од глобалната потрошувачка на нафта, што ја турна волатилноста на нафтата на највисоките нивоа од 2020 година наваму. И покрај рекордното ослободување на 400 милиони буриња на нафта од итните резерви, големи институции предупредуваат дека недостигот во снабдувањето и натаму останува нерешен на краток рок.
Со нафтените фјучерси во моментот се тргува во состојба во која краткорочните цени се повисоки од долгорочните договори, што укажува на итна побарувачка за непосредна испорака. Сепак, пазарите очигледно очекуваат дека овие нарушувања нема да бидат трајни. Историски гледано, ваквите нагли скокови на волатилноста кај нафтата најчесто траат кратко, а потоа честопати следуваат силни закрепнувања на пазарите на акции.
Во услови на оваа турбуленција, Биткоин покажува променливо, односно еволуирачко однесување. Иако традиционално не се смета за дефанзивно средство, во последниот период тој делува како заштита од геополитички ризик. Од почетокот на конфликтот, Биткоин ETF-фондовите забележале приливи од 1,5 милијарди долари, додека големи ETF-фондови поврзани со S&P 500 и Nasdaq имаат значителни одливи. Оваа разлика сугерира дека институционалните инвеститори сè повеќе ги гледаат дигиталните средства како алатка за диверзификација во периоди на неизвесност.
Корпоративното усвојување дополнително го поддржува овој тренд. Strategy, најголемата трезорска компанија што држи Биткоин како дел од својата корпоративна резерва, неодамна купи повеќе од 22.000 BTC во вредност од приближно 1,57 милијарди долари, со што ја потврди долгорочната доверба во ова средство. Од почетокот на годината до денес, компанијата акумулирала значителни Биткоин позиции, што укажува на континуирана институционална побарувачка.
Во исто време, растот на цените на нафтата и храната влијае врз очекувањата за монетарната политика. Пазарите значително ги намалија очекувањата за намалување на каматните стапки во 2026 година, при што првото намалување сега не се очекува пред септември. Федералните резерви на САД ја задржаа својата референтна каматна стапка во опсег од 3,50% до 3,75% и усвоија претпазлив пристап на „чекај и набљудувај“, сигнализирајќи дека засега нема непосредни планови за ново зголемување на стапките, но истовремено признавајќи дека ризиците од инфлација и понатаму се присутни.
Гледајќи напред, пазарите се подготвуваат за зголемена волатилност. Голем настан на истекување на опциски договори, при кој приближно 35% од изложеноста на американскиот опциски пазар ќе истече или ќе се затвори, се совпаѓа со важно ребалансирање на акциските индекси. Оваа комбинација се очекува да доведе до повисоки обеми на тргување и посилни краткорочни ценовни осцилации.
Дополнително и Биткоин се соочува со значајно истекување на опции во вредност од околу 14 милијарди долари, што може да резултира со движење на цената во ограничен опсег и непредвидливи движења поради активности за заштита од ризик.
Генерално, пазарите во моментов се водени од сложена комбинација на геополитички тензии, шокови во снабдувањето и променливи очекувања за монетарната политика. Иако краткорочната неизвесност останува висока, структурни трендови како што се институционалното усвојување на Биткоин и очекувањата за евентуално олеснување на монетарната политика продолжуваат да ја обликуваат пошироката пазарна перспектива.