Европската комисија, Европската централна банка и Меѓународниот монетарен фонд ги разгледуваат последните грчки предлози и вечерва ќе ја завршат нивната проценка, јави дописникот на МИА од Атина.
Работната група на еврото ќе има состанок утре во 11 часот, а попладнето е закажана и средба на еврогрупата.
Грчките медиуми цитираат анонимен извор од еврозоната според кого инситутциите исто така ќе направат проценка на барањето на грчката Влада за нова финансика помош од Европскиот механизам за стабилност (ЕСМ), земајќи ја предвид стабилноста на еврозоната, одржливоста на грчкиот долг и вистинските финансиски потреби на земјата во следните години. Пред се, институциите ќе извршат проценка на грчките предлози со списокот приоритетни дејствија.
Ако на утрешниот состанок на еврогрупата биде одобрена нова прогрма за поддршка на Грција, тогаш можеби нема да има потреба од самит на ЕУ во недела.
Во врска со таканареченото „преодно финансирање“ кое ќе ги покрие финансиските потреби на Грција за следниот месец, истиот извор истакнал дека за да почнат дискусиите, мора да има договор за долгорочно финансирање на грчката економија. Тој исто така појаснил дека евентуален договор со ЕСМ не значи дека ќе можат да се исплаќаат рати.