Американскиот државен секретар Џон Кери би можел да заработи неколку стотици илјади долари, од денешната продажба на компанијата за производство на кечап и сосови “Хајнц”, на американскиот милијардер Ворен Бафет.
Бафет и една бразилска инвестициска компанија склучија договор за купување на компанијата “Хајнц” за 23 милијарди долари.
Во оваа компанија, акции има и фамилијата Кери и тоа, според податоците од 2010 година, во износ од најмалку три милиони долари.
Тие акции сега, бидејќи Кери извршува јавна функција, се водат на сопругата на Кери, Тереза.
За сега, не е познато дали ќе се продаваат акциите на “Хајнц” пред склучувањето на договор за продажба.
АП проценува дека со таквата продажба, Кери би можел да заработи до еден милион долари.
Компанијата на Бафет “Беркшир Хатавеј” и фондот “3Г Капитал” ќе му плати за купување на “Хајнц” 72,50 долари по акција. Акциите на “Хајнц” денес на берзата вредеа 60,48 долари.