Aмериканската поштенска служба е пред банкрот, со долгови од повеќе од пет милијарди долари, кои не може да ги исплати без државна помош.
Се очекува поштата да продолжи да функционира без застој, но ќе престане да го финансира пензиите на своите поранешни вработени. Раководството на поштата се надева на помош од сојузниот буџет, но конгресмените бараат поштата да спроведе сериозни реформи пред да добие пари.
Банкротот на поштата и неможноста да ги покрие обврските кон сопствените вработени и пензионери е пример на лошо управување и намерно затворање на очите пред суштинските промени кои се случија во бизнисот со испорачување на писма во САД. Раководството на поштата упорно одбива да ги спроведе потребните мерки за намалување на нивните трошоци, изјави републиканскиот конгресмен Дарел Иса.
Американската пошта има половина милион вработени и годишен буџет од над 70 милијарди долари. Се смета дека се работи за најголемата транспортна компанија во светот, со над 200.000 возила кои секојдневно разнесуваат пошта низ САД. Подемот на приватните компании за дистрибуција на пакети и на брза пошта, како и на интернетот кој ја замени комуникацијата со писма, доведе до намалување на прометот во државната пошта, која загуби една третина од својот промет во изминатите 10 години.
Растечките обврски за исплата на пензиите на поранешните вработени и за планирање на пензиите на сегашните вработени се дополнителниот удар за американската пошта. Конгресот бара поштата да ги намали трошоците, да ги затвори поштите во помалите места низ САД и да го намали обемот на работа преку викендот, како услов за евентуално добивање парична помош.