Заменик-министерот за култура Владимир Лазовски од 18 до 21 јануари присуствува на церемонијата на отворање на Европскиот град на културата за 2019 година во Матера – град во јужна Италија. Целогодишната програма ќе се одвива под мотото „Отвори иднина“.
Во рамките на програмата „Матера – Европски град на културата 2019“, од Македонија ќе биде реализиран проектот „Поетика на срамот“. Премиерата ќе биде на 9 март, а ќе има уште една изведба на 11 март во Лече, објави Министерството за култура.
Историскиот центар „Саси“ и паркот на Рупестарските цркви во Матера се културно наследство заштитено од УНЕСКО, што на градот Матера драстично му го зголеми бројот на туристите. Матера е познат како подземен град поради големиот број куќи изделкани од сив камен, наредени една врз друга со ровови што претставуваат улици.
Титулата „Европска престолнина на културата“ во 2019 година Матера ја дели со бугарскиот град Пловдив.