Скопскиот дувачки квинтет во состав Марија Јакимовска-флејта, Васил Атанасов-обоа, Ристо Ѓоревски-кларинет, Александар Гошев-хорна и Марјан Милошевски-фагот настапи на сцената на катедралата „Св. Ана“ во Виена.
По настапот квинтетот беше вратен на бис и продолжи со композиции што не беа предвидени во програмата. Посебен интерес предизвикаа делата на македонските автори Љубомир Бранѓолица (композиции на фолклорни теми) и Глигор Смокварски (Тешкото, фрагмент од балетот „Македонска историја“). Освен нивните дела, беа исполнети и композиции на Хајдн, Фаркаш, Лиадов, Бизе и Штраус.
Настапот го организираше Амбасадата на Република Македонија во Австрија, а за значењето на културната размена меѓу двете држави говореше македонскиот амбасадор Ѓорѓи Филипов.
Во публиката покрај членовите на дипломатскиот кор, присуствуваше и апостолскиот нунцие, епископот д-р Петер Штефан Цурбриген.
Покрај настапот во катедралата „Св. Ана“, Скопскиот квинтет настапи и во просториите на Македонската културна заедница во Виена.