Поетски карван денеска ќе се одржи пред манастирот „Свети Ѓорѓија“ во прилепското село Присад. Организатори се Друштвото на писатели на Македонија, младинската организација „Почувствувај ја Македонија“ и Здружението на пензионери на Македонија и иселеници.
Свои дела ќе читаат Василе Димески, Елена Пренџова, Бобан Богатиновски, Марина Мијаковска, Васо Николовски, Марта Маркоска и Перо Миленкоски. Покрај нив, својата монодрама „Крале Марко (Синот на Волкашин)“ ќе ја изведе Славчо Ковилоски, а ќе може да се ужива во музиката на дуото „Signature“ составено од Нина Милановиќ – виолина и Трајанчо Стојановски – гитара. Цветни пораки за мир ќе изработува уметникот Живко Поповски – Цветин.
Карванот почна на 22 јуни во Дебар, а на 13 јули се одржа во Охрид. Во карванот до крајот на годината ќе учествуваат 60 поети во рамки на проектот „Почувствувај ја Македонија“, со цел афирмација и доближување на литературното творештво до читателите.
Средбите со љубителите на пишаниот збор се одржуваат на неконвенционален начин, на отворен простор и се во функција на запознавање со природните убавини, историските знаменитости и духовните светилишта на Македонија.