Со претставата „Мечка“ од Чехов на Театар Комедија-Скопје во режија на Димче Николовски, вечер во Пустец, Албанија, ќе биде отворено 12. Македонско културно лето.
На фестивалот кој се одржува на плоштадот „Гоце Делчев“, до 5 јули од 20.30 часот ќе бидат изведени уште четири претстави на македонски театри. Организатор е Здружението на Македонците по потекло од Албанија „Сонце“ – Скопје и Едмонд Сотир.
Утревечер на програмата е „Умри машки“ од Николај Алдо во режија на Коле Неделковски и во изведба на театарот „Ацо Шопов“ од Штип. В среда ќе гостува ансамблот на Велешкиот театар со претставата „Црвенкапа“, адаптација на Сашо Димовски и режија на Деан Дамјановски, в четврток ќе биде изведена „Мани, мани, мани“ според Реј Куни во режија на Бојана Краљевска и Горан Илиќ на Кумановскиот театар.
Фестивалот ќе заврши на 5 јули со „Волшебната флејта“ на Русомир Богдановски во режија на Александар Ивановски на Театарот за деца и младинци, а по неа од 22 часот е свеченото затворање со доделување признанија.
Годинашното Македонско културно лето во Пустец е поддржано од Министерство за култура на РСМ, Град Скопје и од спонзори.