Во фоајето на Македонската опера и балет вечерва концерт ќе одржи диригентот Сашо Татарчевски и мешаниот хор „Про Арс“.
Концертот е насловен „Бисери на македонското хорско творештво“, а на програмата се композиции од претставниците на првите генерации на македонската композиторска школа, Властимир Николовски, Кирил Македонски, Стефан Гајдов, Тодор Скаловски, Трајко Прокопиев, Стојан Стојков и Драган Шуплевски.
Професионалниот мешан хор „Про Арс“ е формиран 2011 година од диригентот Сашо Татарчевски. Во своето петгодишно делување хорот има настапи на Охридско лето, Денови на македонска музика, самостојни концерти од циклусот „Јубилеи“, соработка на проекти со разни други институции и фондации како и студиски снимки за високобуџетни филмски остварувања и странски едукативни програми.