Концерт на дуото „Скупи“ се одржа синоќа во Домот на културата „Иван Мазов-Климе“ во Кавадарци. Јета Старова Мехмети на флејта и Ермаљ Мехмети на виолина се претставија со „Македонски звуци“.
Говорејќи за животот и делото на уметниците, кои имаат освоено бројни награди и признанија во земјава и странство, актерот Диме Коцевски истакна дека дуото „Скупи“ постои од 2006 година.
– Оттогаш со голем успех настапува на значајни фестивали, манифестации и рецитали во Македонија, Европа и САД, рече Коцевски.
Дуото е добитник и на статуетката за хумани и музички активности „Мајка Тереза“. Има издадено два албума од кои едниот се преработки на стари албански песни и теми, а другиот преработки на македонски стари песни и ора.