Битолското културно лето „БитФест“ вечер продолжува со два концерти, промоција на документарниот филм „Мостот помеѓу Битола и Нинбо“ и почеток на дводневниот креативен арт фестивал „Ако одам во Битола“.
Документарниот филм „Мостот помеѓу Битола и Нинбо“ е инспириран од збратимувањето на македонскиот и кинескиот град, обостраните посети на делегации од двата града во двете држави, како и изградбата на мостот на пријателство по кој како што велат авторите на филмот ќе минуваат научни работници, бизнисмени, претставници на културата, спортот и други професии кои ќе се здружуваат во наредниот период.
– На „БитФест“ владее голем интерес за двата вечерешни концерти кои ќе се одржат во Битола. Првиот е во рамки на уметничката манифестација „Незаборав“ и е посветен на македонската естрадна ѕвезда Гоце Николовски. Очекуваме во големата сала на битолскиот Центар за култура присутната публика уште еднаш да ги отпее легендарните „Бисер балкански“, „Серенада“ и други песни на прерано починатиот Николовски, чии композииции вечер ќе ги интерпретираат Сефедин Бајрамов, Бојан Стојков и други, додека вториот концерт „Танго Трио“ е на Широк Сокак и ќе го приреди Пламенка Трајковска. Влезот за двата коцерти е бесплатен, информираат од „БитФест“.
Вечер во Битола ќе почне и дводневниот креативен арт фестивал „Ако одам во Битола“, кој ќе се одржува во Боемската улица.
Битолското културно лето „БитФест“ завршува на 27 август со манифестацијата „Широк Сокак во бело“.