Сојузот на композиторите на Македонија денеска ќе организира дискусија на тема „Македонското музичко творештво – сегашност и минато“, чија цел е да се поттикне и унапреди научноистражувачката дејност во областа на музикологијата, етномузикологијата, музичката византологија, танцовата уметност, музичката педагогија, музиката и поезијата, музиката и медиумите.
На настанот ќе учествуваат Јане Коџабашија, Емилија Џипунова, Јулијана Жабева-Папазова, Весна Малјановска, Даница Стојанова и Мирјана Павловска-Шулајковска, кои ќе презентираат научни трудови за различни сегменти од областа на македонското музичко творештво: византиска музичка традиција, современата танцова култура, современото македонско творештво, музиколошките истражувања и нивната реализација, како и творештвото на македонските композитори на концертните подиуми и телевизиската програма.
Идејата за настанот воедно е придонес и во одбележувањето на јубилеите на композиторите Томислав Зографски и Гоце Коларовски.