Александра Крстевска и Васе Ѓорѓевски се годинашните младенци на Галичка свадба. Младенците во традиционална носија синоќа беа претставени пред присутните во Музејот на Македонската борба за државност и самостојност, на промоцијата на монографијата Галичник засекогаш на Киро Кипроски.
Мавровецот, Ѓорѓевски и скопјанката Крстевска, која потекнува од реканското село Гари, пред присутните рекоа дека се возбудени што изборот паднал на нив и оти достојно ќе ги престават вековните свадбарски обичаји на галичани за Петровден. Тие, нивната деветгодишна врска ќе ја крунисаат во црквата „Св. Петар и Павле“ на 14. јули.
Организацискиот одбор, месната заедница Галичник, објави дека годинашното јубилејно 40-то издание на културолошко-туристичка манифестација Галичка Свадба ќе се одржи на 13 и 14 јули.