Педесетина делчевчани се вклучија во еко-пикникот и работната акција за реконструкција и уредување на излетничкиот локалитет Св. Ѓорѓија, што ги организираше невладината организација КХАМ од Делчево.
Во акцијата беше изграден летниковец од дрвена конструкција, беа поставени нови клупи и маси, се обнови постојната урбана опрема и се исчистија дивите депонии во околината на локалитетот.
Главна цел на активноста беше подигање на јавната свест за различните можности што ги има секој поединец за придонес во заедницата, како и колективното вклучување за решавање на одредени проблеми што ќе се оценат како приоритетни.
– Нашата акција покажаа дека соработката на граѓаните со локалните институции е возможна, а со желба и проактивност може да се случи промената што сите сакаме да ја видиме. Очекуваме да продолжи ентузијазмот кај граѓаните да влијаат врз промените, но и совесно и грижливо да се грижат за урбаната опрема и природната средина, рече Ромина Кајтазова од НВО КХАМ – Делчево.
Акцијата се реализираше во рамки на иницијативата „Мрдни со прст“, а во соработка со Локалниот младински совет од Делчево.