Со монодрамата „Ќиро“ во која настапува хрватскиот актер и шоумен Тарик Филиповиќ, вечер во Битола завршува 20. јубилејно издание на Интернационалниот фестивал на монодрама.
На денешната средба со новинарите во фестивалскиот прес-центар во Битола, Филиповиќ изјави дека иако во последниов период е препознатлив по телевизиските квиз и шоу програми, сепак тој е актер кој настапил во повеќе од 4.000 претстави.
– Монодрамата „Ќиро“ е инспирирана од познатиот фудбалски селектор Ќиро Блажевиќ и вечер во Битола ќе ја одиграм по 54 пат. Текстот го работев половина година, а кога почнав да го презентирам пред публиката сфатив дека е вонвременски. Во монодрамата „Ќиро“ се отсликува животот, шармот на Ќиро Блажевиќ…се нуди одговорот на едно често поставувано прашање зошто Ќиро секогаш носи бел шал, а го носи затоа што го обожува францускиот глумец Шарл Боае, рече Филиповиќ.
Гостинот од Хрватска потсети дека имитацијата на разни личности е негова лична вештина и додаде оти ги имитирал Милан Гутовиќ, Миљан Миљаниќ, Фрањо Туѓман и други јавни личности како актерски предизвик.
– Среќен сум што мојата актерска кариера се развиваше во време кога настапуваа Фабијан Шоваговиќ, Борис Дворник, Мустафа Недаревиќ…и други актери од таа генерација кои посебно ги почитував и почитувам. Уживам во актерството, а сакам и да подарувам и често пати сум донирал од моите различни по боја очила кои искрено постигнувале и висока цена на различни аукции. Ќе звучи интересно, но јас од хрватските продавачи на очила добив плакета затоа што им се зголеми продажбата на очила, рече меѓудругото Филиповиќ.