Во Музеј на Град Скопје вечер ќе биде поставена изложба за истражувачкиот проект „Скопските вертикали“ на авторите Јован Ивановски, Ана Ивановска Дескова и Владимир Десков.
Целта на истражувачкиот проект, раководен од Фросина Зафировска, кустос советник, е документирање, проучување и претставување на истакнати примери на архитектонското творештво од периодот на Модерната, значајни за урбаниот развој на градот Скопје.
Изложбената поставка е составена од макети, како и од пратечки графички и фотографски материјали.
Проектот ќе биде претставен и во печатена публикација со архивски, документарен и аналитички графички материјал за триесетина изградени примери на архитектонската типологија на висококатници изградени во Скопје во 20. век.
Изложбата е финансиски поддржана од Министерството за култура и град Скопје.