Група граѓани собрани пред Собранието на Република Македонија протестираат против НАТО.
Денешниот протест пред парламентот се случува во пресрет на обраќањето на генералниот секретар на НАТО, Јенс Столтенберг, пред македонските пратеници.
Тие извикуваат „Уа НАТО“.
Претходно Солза Грчева преку Фејсбук повика на протест за како што напиша, да кажеме дека имаме едно име – Република Македонија.
„Ги повикувам сите поддржувачи на Глас за Македонија, да ми се приклучат на протестите утре во 11 часот пред Собрание. Ова е дел од поширока иницијатива. Јасно да кажеме дека имаме едно име: Република Македонија. Таму ќе има луѓе од различни идеолошки опции, но заедничко ни е што сакаме да си го одбраниме името и достоинството на македонскиот народ. Затоа, ГЛАСно за Македонија!“, напиша Грчева на својата официјална фејсбук страница.
На денешниот протест пред парламентот учествуваат и членови и приврзаници на политичката партија „Левица“ кои сметаат дека е потребно решавање на суштинските проблеми на земјата, сиромаштијата и невработеноста, а не замајување на народот со лажни приоритети, како зачленувањето во НАТО.
„НАТО е воен пакт, реликт од студената војна, а не безбедносен сојуз како што милуваат да го нарекуваат апологетите овој воен пакт“, истакнуваат од „Левица“.
Инаку, „Левица“ која отворено е против членството во НАТО, минатата година се спротистави на одржувањето на воената вежба на американските војници „Драгон Гардијан 2017“ во земјава. Четворица демонстранти од „Левица“ беа приведени па пуштени откако истакнаа транспарент на кој пишуваше „Против војна за профити“ за време на презентацијата на опремата на АРМ и на Армијата на САД во центарот на Скопје.