Проблемот кој искрсна помеѓу телевизиите и здружението Македонска музичка индустрија не оди во прилог на поддршка на македонското музичко творештво, изјави денеска во Гостивар министерката за култура Елизабета Канческа-Милевска во врска со потегот на неколку телевизии да не емитуваат музика на македонски автори.
– Министерството упати барање до телевизиите кои добиле допис од ММИ, да го препратат до нас и да го разгледаме. Ние претходно, по извршениот надзор, препорачавме да се преговара и да се договорат условите на соработката помеѓу телевизиите и ММИ околу начинот на прибирање на средствата. Доколку здружението ММИ не постапило по препораката и не доставило допис за договарање и преговарање за наплатата и тарифникот, не може и неприфатливо е да врши наплата. Доколку тоа е сторено, Министерството ќе преземе соодветни мерки, изјави министерката Канческа-Милевска.
Министерството за култура минатиот месец изврши увид во општите акти на ММИ, организацијата за колективно управување на правата на произведувачите на фонограми и уметниците музички изведувачи, и утврди дека непрописно се наплаќа користењето на музиката на јавни места. Со тоа ММИ, додека не ги исполни пропишаните критериуми, ќе нема право во име на авторите да наплаќа за музика што се пушта во кафе-барови, ресторани, салони, телевизии и други субјекти.
Министерството за култура започна постапка за изменување и дополнување на Законот за авторското право и сродните права.