Поголем број читатели на еден од најлибералните кинески весници протестираа денеска пред влезот на зградата на овој печатен медиум, во редок протест поради цензура, истовремено поддржувајќи го и невообичаениот штрајк на новинарите против мешањето на провинциските власти во пишувањето на весниците.
Протестот во Гуангџоу, главниот град на просперитетната и развиена провинција Гуангдонг, започна по судирот меѓу власта и новинарите околу слободата на медиумите. Набљудувачите ова го доживуваат и како проба за приврзаноста кон реформите на новиот шеф на Комунистичката партија Сји Ѓинпинг.
Незадоволството изби кон крајот на минатата недела по соопштението дека новинарите на влијателниот весник „Неделник на југот“ ги обвинија цензорите дека пораката на весникот до читателите пред Нова Година, со која се барало воведување уставна власт, ја замениле со текст за достигнувањата на партиското раководство.
На различни сајтови денеска се појавија неколку писма во кои се бара од шефот за пропаганда на провинцијата Гуангдонг, Туо Џена да поднесе оставка.
Демонстрантите, главно млади луѓе, поставија транспаренти на кои пишуввало „Слободата на изразување не е злосторство“ и „Кинескиот народ сака слобода“.