„Фискалниот пакт“ на ЕУ, договорен во рамки на напорите да се скроти долготрајната должничка криза, треба денеска да стапи во сила.
Во март минатата година 25 од 27 земји членки на ЕУ го прифатија „правилото за избалансиран буџет“, со цел да обезбедат буџетскиот дефицит на нивните влади повеќе да не биде прекумерен, што беше и причина за должничката криза и речиси го „уништи“ еврото.
Пактот за фискална стабилност, исто така, подразбира казни за државите кои ќе ги прекршат правилата и нема да го ограничат јавниот долг и дефицит, со централизиран надзор од ЕУ.
Британскиот премиер Дејвид Камерон одби да го потпише пактот, кој Лондон го оценува како продолжување на мешањето на Брисел во клучното право на една држава да ги одредува даночните правила и приоритети на потрошувачката. Неговото мислење го дели и скептичната Чешка.
Било потребно договорот да го ратификуваат 12 членки на еврозоната, а тој услов е исполнет минатата недела, откако тоа го направи и Финска, па пактот стапува во сила денеска.
„Фискалниот пакт“, пред Финска, го ратификуваа Австрија, Кипар, Германија, Естонија, Шпанија, Франција, Грција, Италија, Ирска, Португалија и Словенија.