Еврогрупата на вонредно заседание синоќа го одобри првичниот договор меѓу Грција и нејзините кредитори околу пакетот реформи предвидени со програмата за спас на земјата, објави весникот „Катимерини“.
Договорот меѓу Атина и кредиторите, кој беше постигнат пред три дена, го трасира патот за исплата на следната транша од кредитите за помош на Грција.
Според весникот, на вонредната средба на Еврогрупата не било разгледувано барањето на Атина за отпишување на грчкиот долг.
Претставник на Еврогрупата во изјава за „Катимерини“ нагласил дека учесниците на средбата го поздравиле договорот меѓу грчките власти и кредиторите, но дека одлуката за исплата на следната транша од помошта ќе биде донесена дури откако Грција ќе ги усвои мерките за штедење, кои инвеститорите ги бараат од неа.
Тој додал и дека на средбата не било разгледувано барањето на Атина за отпис на долгот, нагласувајќи дека е неопходно да се направи детална анализа за неговата одржливост.