Во медиумските известувања околу ЕУ годинава, со оглед на економската криза во Грција и во други јужноевропски земји, одвај беше споменувана можноста од натамошно проширување на Унијата со нови членки, јави дописникот на МИА од Гетеборг.
Шведска, а особено шефот на шведската дипломатија Карл Билд, силно се залага за прием на нови членки.
На последниот состанок на шефовите на дипломатиите на земјите-членки на ЕУ во Брисел, се направени мали, но, според Карл Билд, сепак значајни чекори.
Според него, проширувањето на ЕУ има големо значење. – Проширувањето е едно од најзначајните и најтешки политички подрачја со кои се соочуваме, при што продлабочувањето на соработката на тој план само ја засилува економија и стабилноста во Европа, вели Билд.
Проширувањето значи дека ЕУ станува поважен глобален фактор, но, како што потенцира Билд, пред се претставува поттик за забрзување на процесот на помирување, меѓу другото, на Балканот.
– Ако портата на ЕУ биде затворена за балканските земји, ќе се отвори простор за други, мрачни сили, вели шефот на шведската дипломатија за „Свенска дагбладет“.