Околу 250.000 Романци излегоа синоќа на улиците во десетина градови на протести против спорниот декрет за декриминализација на некои корупциски дела.
Бројот на демонстранти беше речиси колку и претходната ноќ, пренесува БТА.
Според проценките на романската полиција, околу 80.000 лица се собрале пред седиштетот на романската Влада на главниот плоштад во Букурешт.
Премиерот на Романија Сорин Гриндјану, чија Влада беше формирана пред помалку од еден месец изјави дека не планира да го поништи декретот на кој многумина гледаат како повлекување од борбата против корупција.
Романскиот претседател Клаус Јоханис најави дека декретот ќе биде изнесен пред Уставниот суд.
Овој суд е последната институција што би можела да го спречи законот на владејачките социјалдемократи, чиј лидер Ливиј Драгнеа е меѓу осудените за корупција.
Министерот за правда Флорин Јордаке, кој го донесе спорниот декрет за корупција, привремено му ја предаде должноста на неговиот заменик до 7 февруари.
Министерот за бизнис, трговија и претприемништво Флорин Жиано изјави дека поднесува оставка, бидејќи така му диктира совеста.
Заменик-претседателот на социјалдемократите повика на анулирање на спорниот декрет.
Уредбата на романската Влада, која подразбира и нацрт-закон за помилување на осудени лица, е критикувана како најголемо отстапување од антикорупциските реформи од 2007 година, кога Романија стана членка на ЕУ.
Со декретот ќе се овозможи декриминализација на прекршоци во врска со злоупотреба на власта, чиј износ не преминува 48.000 долари.