Граѓаните бараат промени за законите да важат за сите подеднакво и за да може креаторите да одговараат и да започне процес на стабилизација и на економски развој во Македонија. Нема да се смириме додека нема правда, нема да дозволиме со изборите да се покрие масовното прислушување и газењето на основните човекови права и слободи, рече носителот на кандидатската листа на Коалицијата за промени и правда во изборна единица 1, Павле Трајанов.
– Деновиве слушам дека некој сакал да избега од избори, им порачувам на тие што раководат со ВМРО-ДПМНЕ, нема бегање од народот, мора да се соочат со народот. На 11 декември мора да го признаат и прифатат поразот, народот нив ќе ги порази. Слушам дека Никола Груевски сакал да бега од Скопје, не сака да се соочи со мене и Стево Пендаровски, сакал да бега во четвртата изборна единица, но таму ќе го пречека Слободан Богоевски и уште полошо ќе помине, рече Трајанов.
Тој истакна дека Коалицијата нема да дозволи да се поркие грабежот на народот со стотици милиони евра и дека парите ќе се вратат кај граѓаните.
– Ветувам, ако ја добиеме власта ќе се справиме со мафијата која што ја изеде Република Македонија и ќе ги натераме парите да ги вратат на граѓаните. Наши приоритети се влез во ЕУ и НАТО. Ние сме сигурни затоа што имаме знаење, искуство и кадри Македонија во наредните 4 години да ја внесеме во ЕУ и НАТО, нагласи Трајанов.