Почина познатата македонска писателка Ката Мисиркова – Руменова, по долго боледување, на 82 годишна возраст.
Погребот ќе биде утре на скопските гробишта Бутел. Блиските, пријателите, колегите и почитувачите на делото на Мисиркова – Руменова ќе се простат со неа во капелата на гробиштата Бутел од 10:30 до 11:30 часот.
Ката Мисиркова – Руменова зад себе остави богат творечки опус. Родена е на 14 септември 1930 година во село Постол, Егејска Македонија. Членка на Друштвото на писателите на Македонија беше од 1966 година.
Ката Мисиркова – Руменова е автор на преку 40 дела, меѓу кои: „Жешка земја”, „Големите атови”, „Пранги”, „Длабокиот рез”, „Милосија”, „Мајка Которичанка”, „Записи за Пела”, „Илинденски раскази”, „Скаменета солза”, „Плач пред ѕидот”, „Белегзија” и многу други.