Советот на ЕУ денеска ја продолжи важноста на економските санкции против определени сектори на руската економија до 31 јануари 2017 година, информира прес службата на ЕК.
Мерките беа воведени на 31 јули 2014 година, првично на една година, како одговор на активностите на Русија во дестабилизирањето на ситуацијата во Украина. Во септември 2014 година мерките беа засилени. Тие се насочени кон финансискиот сектор, енергетиката и одбраната и во сферата на производите со двојна употреба.
На 19 март 2015 година Европскиот совет постигна согласност продолжувањето на санкциите да го обврзе со целосната примена на спогодбите од Минск, што, според планот, требаше да заврши до 31 декември 2015 година.
Бидејќи спогодбите од Минск не беа во целост применети до 31 декември 2015 година, Советот ги продолжи санкциите до 31 јули 2016 година.
Откако направи нова проценка на исполнувањето на спогодбите од Минск, Советот одлучи да ја обнови важноста на санкциите за уште шест месеци, до 31 јануари 2017 година.