Контрадемонстрантите предводени од владејачката ВМРО-ДПМНЕ кои од вчера ги блокираа сите влезови кои водат до Уставниот суд велат дека дошле на протест за да го бранат Уставниот суд, но повеќето од нив не знаат дека со нивното присуство ја бранат одлуката да се помилуваат педофили.
На прашањето дали знаат дека со измените на законот, за кои „АЈДЕ“ вчера протестираше, а поради кои збунетите граѓани беа поставени наводно да го бранат Уставниот суд, ќе може да се помилуваат луѓе кои вршеле изборни измами, педофили и други кои извршиле тешки кривични дела, тие велат дека се против такви одлуки.
– Уставниот суд треба да работи без притисок, сепак се тие квалификувани да го работат тоа што го работат, луѓе школовани кои си ја знаат својата работа. Си има процедури и закони кои треба да се почитуваат за сите, не само за едни, а за други да не важат, вели велешанецот Роберт Николиќ.
Според нив, демонстрантите од „АЈДЕ“ настапиле многу агресивно, што ги натерало нив да го чуваат Уставниот суд.
– Не верувам дека овој суд ги штити тие кои допринеле зло на народот, не верувам дека педофилите ги штити. Судот бил секогаш реален и мислам дека такво нешто нема да помине кај нив, вели Драгица Ангелковска од Петровец.
Граѓаните велат дека од ова би можело да дојде до граѓанска војна. Според нив, никој не е чист.
– Кој нема грешки, има судови кои треба да одлучат. Народот се врти против себе, имам јас од СДСМ пријатели, па ете, кажувам дека сум од ВМРО. Од деца сме растеле заедно, како сега да се делиме, вели граѓанин.
Александар Тодески