МЖ ТРАНСПОРТ АД – Скопје како невистинити и паушални ги оцени тврдењата во денешната изјава на на Благој Бочварски, претседател на Комисијата за транспорт и врски на СДСМ, во врска со кинеската современа електромоторна патничка гарнитура.
– Не е точно дека новиот воз не е соодветен на македонската инфраструктура и оти не може да ги поднесе вибрациите. Напротив, тој е соодветен на истата, која пак е со европски стандарди – како и новиот воз. Причината зошто новиот воз се уште не е во редовен сообраќај е тоа што по завршените успешни тестирања од страна на Европско нотифицирано тело следува издавање на сертификат, кој се очекува да биде издаден наскоро, стои во реакцијата од МЖ ТРАНСПОРТ АД – Скопје .
Тоа е процедура, се наведува, која мора да биде завршена.
– Ова СДСМ не го знае и не може да го земе во предвид, бидејќи во периодот додека беше на власт не зашрафи ни еден шраф, а не да купи нови возови или да изгради нови пруги. Единствено што СДСМ направи е што испушти од работа стотици вработени и ги запостави сите постојни пруги, се вели во реакцијата.
Доколку СДСМ работеше барем со пола енергија од таа што сега ВМРО-ДПМНЕ ја вложува во изминатиов период за обнова на железничкиот систем, стои во реакцијата, тогаш македонските граѓани немаше да се соочуваат со проблемите кои ги носат старите и дотраени возни средства.