Најуспешниот клуб во шаховската историја на Македонија, ШК Алкалоид, добива засилување од пет странски велемајстори, непосредно пред подготовките за најсилното клупско шаховско натпреварување – Европски клупски куп кое ќе се одржи во Скопје, во октомври годинава.
Покрај најдобрите македонски шахисти, боите на Алкалоид ќе ги бранат и петмина од топ 50 на светската рејтинг листа, кои ќе настапат и на екипниот Шампионат на Македонија, кој ќе се одржи од 20-ти до 26-ти јули годинава, во Струга.
Најновите засилувања на ШК Алкалоид се: Дмитриј Јаковенко, Јуриј Криворучко, Васиљ Иванчук, Дмитриј Андрејкин и Евгениј Томашевски.
Јаковенко (Русија) беше европски шампион во 2012 година, светски јуниорски првак до 18 години во 2001 година, првак на Европскиот екипен шампионат за 2007 година и носител на сребрен олимписки медал за 2012 година.
Томашевски стана европски шампион 2009 година, а има освоено прво место со руската репрезентација на Светскиот екипен шампионат во 2010 година.
Украинецот Иванчук неколку пати бил на второ место на светската рејтинг листа. Со репрезентациите на СССР и Украина има освоено 4 златни, 1 сребрена и 3 бронзени олимписки медали, а во периодот од 2007-2008 е Светски шампион во брзопотезен шах (blitz).
Рускиот шахист Андрејкин има титули светски јуниорски првак за 2010 година и шампион на Русија за 2012 година.
Членот на украинската репрезентација Криворучко пред две години беше шампион на својата земја.