Американската компанија „Кока-Кола“ соопшти дека нето профитот во третиот квартал е зголемен за 3% благодарение на тоа што се проширила во пазари со раст, а на домашниот пазар продале повеќе енергетски пијалоци и чаеви.
Компанијата наведува дека глобалниот обем на продажба е зголемен за четири отсто во третиот квартал, но растот е поизразен на пазарите во раст. На пазарот во Северна Америка, Кока-Кола има раст на продажбата од два отсто, додека продажбата на „кока-кола“ и “спрајт“ во Индија е зголемена за 34 односно 15 отсто.
„Тоа го постигнавме со константно инвестирање во нашиот бизнис и нашите марки, за да обезбедиме дека нашето глобално портфолио денес ќе биде порелевантно и поздраво од кога и да е“, изјави Мухтар Кент, извршен директор на фирмата.
„Кока-Кола“ наведува дека во трите месеци заклучно со 28. септември заработиле 2,31 милијарда долари или 50 центи по акција во однос на 2,22 милијарди или 48 центи по акција во истиот квартал лани. Приходите се зголемени за еден отсто на 12,34 милијарди долари.