Поранешниот премиер на Косово и лидер на Алијанската за иднина на Косово, Рамуш Харадинај, кој е уапсен во Љубљана, во четвртокот изјави дека не се плаши од израчување на Србија,а за словенечката власт рече дека во неговиот случај „постапила срамно“.
„Јас сум во Љубљана, ја чекам одлуката да ми го вратат пасошот за да отпатувам за Приштина. За мене оваа ситуација е неприфатлива, што Словенија ова го нема расчистено. Ако не е нивна грешка, ако не погрешил системот, тогаш оваа власт тука е злонамерна: Не се грижам воопто за Србија, јас сум граѓанин на Косово“, рече Харадинај за Н1.
Оваа телевизија објави дека на Харадинај му бил одреден адвокат по службена должност.
Инаку, Харадинај по апсењето во Љубљана беше изведен пред истражен судија по што му е одземен пасошот и му е забрането да ја напушти државата.
Словенечките правосудни органи ја проверуваат српската потерница и чекаат евентуално барање на Србија за негова екстрадиција.