Косовскиот премиер Иса Мустафа во вторникот ги осуди случувањата во Македонија и порача дека одговорните треба да се изведат пред лицето на правдата, пренесуваат косовските медиуми.
Мустафа, кој во моментов е во посета на Словенија, изразил загриженост поради состојбата во Македонија по крвавите настани во Куманово, но ја исклучил можноста насилството да се прелее на Косово.
Тој порачал дека Косово ги осудува сите постапки кои ја загрозуваат Македонија и го дестабилизираат регионот, потенцирајќи дека косовските органи се подготвени тесно да соработуваат со Македонија и останатите земји во регионот за да се спроведе истрага на сите околности кои довеле до трагедијата во Куманово.
Косовскиот премиер навел дека Косово ја зголемило контролата на границите и дека соработува во размената на безбедносните информации со другите служби во регионот, со кои има воспоставено и координација на активностите.