Официјални претставници на ОН побараа информација за можни трансфери на оружје од Босна и Херцеговина за либиската ќелија на Ал Каеда, што, се претпоставува, биле помогнати од посредници од Србија и Црна Гора, соопшти Хина, повикувајќи се на босанската федерална телевизија ФТВ.
Телевизијата емитува детали од писмо, кое координаторот на експертската комисија на ОН за Либија, Сајмон Диловеј, го испратил до постојаниот претставник на Србија во ОН, Милан Милановиќ. Во документот Диловеј бара информација за српската компанија „Техноремонт“, што е во сопственост на Петар Црногорац.
Во писмото Диловеј прашува дали „Техноремонт“ потпишала договор со Халид аш Шариф, лидерот на либиската ќелија на Ал Каеда, кој е поранешен министер за одбрана и командант на Националната гарда на Либија.
Диловеј побарал копија од договорот, доколку таков е потпишан, како и детали за испораките на оружје.
Извештајот на комисијата, исто така, покажува дека оружјето било извезено и од црногорската компанија „Воена индустрија“, која е во сопственост на Зоран Дамјановиќ. Според ФТВ, компанијата на Дамјановиќ соработувала со шверцерот на оружје Слободан Тесиќ.