Владата се насочува кон реализација на проекти, а доколку некој сака да ја провери нејзината доверба во самиот народ, постојат конкретни демократски институционални механизми што може да се преземат, а во овој момент такви акти и такви иницијативи за барање доверба на Владата пред народот нема, изјави денеска портпаролот на Владата Александар Ѓорѓиев.
Посочи дека меѓу активностите што Владата ги презема и се во тек е и подобрување на изборното законодавство во процедура, заедно и во консултации со останатите политички партии и работни групи.
– Одредени работи на политичката сцена се надмудрувуња меѓу политичките партии и, условно, значат димни завеси, чија цел е да се одземе дел од енергијата на Владата и нејзината насоченост за реализирање на конкретни проекти со кои ќе се соочат потребите на граѓаните. Во петокот низ еден демократски механизам на Владата и беше дадена доверба од страна на Собранието и со неа Владата има обврска да се насочи кон реализацијата на проектите, додаде Ѓорѓиев.