Претседателот на СДСМ, Зоран Заев по исказот во врска со Кривичната пријава за неовластено прислушување што СДСМ ја поднесе до Основното јавно обвинителство, одговараше на новинарските прашања.
Како ќе се враќа довербата во иснтиуциите?
Апсолутно тоа времето ќе го покаже, дека самата вистина и отворањето на вистината испраќа и една друга порака. Никогаш повторно да не се повтори ова што се случува, а повторањето не е само со тоа што некој се дрзнал да слуша толку многу граѓани во Република Македонија, туку последиците допираат до сите пори во системот во којшто живееме.
Кои прашања ви беа поставени во Обвинителството?
Не се коментираат самите прашања затоа што постапката е во тек.
Претседателот на Европската комисија ја одложи посетата и со тоа даде до знаење дека нешто во државата не се случува убаво…
Не би сакал да давам нешто дополнително како наметнато мислење. Вие новинарите и граѓаните согледувате како реагираат меѓународните институции, заради тоа што ако некој се обидува преку перјаници на власта, изразени како поединци или одреден медиум да го залажува својот сопствен народ, луѓето и поголем број на граѓани на Република Македонија, но секако и упатените во меѓународните институции, многу добро знаат и од прилика им е јасно, што се случува во нашата земја.
За случајот Пуч исказ кога ќе дадете?
Тоа зависи, како што знам, бидејќи не сум правник, кога ќе бидеме како повикани како осомничени од Јавното обвинителство. Таму сеуште не сме повикани, ниту јас, ниту некој од луѓето кои ги познавам, кои се во притвор, а знам дека тие ќе одлучат кога ќе имаат доволно докази, значи таму нема ниту обвинителен акт, ниту друг вид на постапка.